بقلم الاستاذ/ سعيد التاجر
متابعة/ خالد الرزاز
رسالة رقم ٢
لمن يعقل أو يتدبر
عزيزي المواطن الغلبان
من مساوئ حريه التعبير عن الرآي والديموقراطية
اذا مدحت أو أعلنت تأيدك لرأي فللأسف قولا واحدا انت مطبلاتي في نظر الآخرين
واذا اعترضت وانتقدت فنفس الآخرين بيشوفوك هدام وحاقد ومعقد وهلم جرا من شاكله هذه المصطلحات
طيب انا المفروض اعمل اي اتفرج واسكت زي شريحه كبيره من الناس علشان اهرب من التصنيف الاحمق ده
ومن منطق أن الرأي امانه وطريق الرشاد والتقويم
فدا رأيي الشخصي وانا مسؤل عنه مسؤوليه كامله
تعالوا ناخدها واحده واحده كدا مع بعض
اللي عايز محصول بيدور علي أرض ويزرعها ويراعيها ولما يجي أوان الحصاد بيحصد وعلي اد تعبه بيلاقي
يعني الشاهد أنه بيشتغل ويتعب الاول وبعدين بيحصد
قس علي كدا بقي كل حاجه في الحياه يعني مثلا مافيش طالب ناجح من غير مزاكره واجتهاد
مافيش بيت ناجح من غير مراعيه واهتمام
مافيش حد في شغل متميز من غير تعب وتفكير وصراع مع الآخرين
مافيش مسؤول مستمر من غير مشقه
مافيش نائب من فراغ
مافيش نائب من فراغ
مافيش نائب من فراغ
قبل ما اسمع منه هيعملي اي لما يبقي نائب المفروض اشوفه عمل اي علشان يبقي نائب
مافيش حد بيجي براشوط كدا يقولك انا وانا وانا وهعمل واسوي اي حد بيستخدم ألفاظ مستقبلية نصيحه ابعد عنه
اصلا الأصل في الموضوع من منطلق تعبه ومجهوداته السابقه فأنا المفروض هقف جنبه وارقيه شويه علشان يبقي عنده سند قانوني يحقق من خلالها اكتر يعني الأسبقية لتعبه ومجهوداته ويجيي بعد كدا اقتناعي وصوتي علشان نحقق المعادله
انا مينفعش اجوز بنتي لواحد جاي يقول انا هدور علي شغل وهبقي اشتري شقه مهما بلغت بي الحماقه والسذاجه
اي حد عاقل لما بيقرر يجوز بنته بيبقي عنده شروط غير قابله للتهاون اولها مصدر دخل ثابت ومكان معيشه دائم حتي لو في بوادر بتقول انه مستقبله مشرق
مينفعش نسلخ قبل ما ندبح
لازم يبقي في حاجه اسمها حد الامان والباقي بيكون رفاهيات
قيس علي كدا برضك كل حاجه محدش بيوصل لاي حاجه من غير ما يعمل شويه ثوابت محسوسه وملموسة
يعني علي سبيل المثال مينفعش طالب راسب أو بالبلدي صاقط في ثانويه يقعد سنه كامله من غير ما يفتح كتاب ولا يذاكر ولا يصلح سلبياته واخطائه ولما يجي يدخل امتحان للمره التانيه يقول لامه والنبي يا اما ادعيلي انجح لا والأدهي أنه يبقي مصدق ومقتنع أنه هينجح علشان امه بتدعيله 🤗🤣
فحضرتك عايزك تقنعني ازاي اوصلك لكرسي لمجرد انك حضرتك شوفت نفسك تستحق وبالزاميه معينه علي سبيل المثال
الزاميه البلد الواحد من وجهة نظر كل مرشح و بلده
أو الحلم المشترك اللي عباره عن شقين صوتي و مجهوداتك
طب صوتي يا سيدي ومضمون وهديهولك بصفتي ابن بلدك
وهنا الكلام عام لكل مرشح لا اخص بيه شخص بعينه علشان العموميه للجميع وليس لمرشح بعينه
فين مجهوداتك فين شغلك في الشارع من سنين
فين التحالفات اللي معاك
فين رؤوس العائلات اللي معاك بره وجوه
فين حضرتك من سمنود اللي اصلا قلما بتشارك وتنزل
فين حضرتك من الخط التاني
أو فين حضرتك من الخط بتاعنا لو انت من الناحيه التانيه
أو فين حضرتك من قري المركز لو انت مرشح من المدينه
ومازال للحديث بقيه
