محمد عوض عيسى يكتب:
================
الوضع الحالي لنادي غزل المحلة فى حالة يرثى لها ويفتح أبواب القلق والوجع على مصراعيها لكل محب وعاشق لهذا الكيان العريق زعيم الفلاحين.
البداية والنتائج لحد دلوقتي لا تسر عدو ولا حبيب ومبشرة بكارثة لو متمش تدارك الأمر فوراً وقبل ما التسرع وغياب التخطيط يدخلوا الفريق في دوامة لا مخرج منها.
النقطة اليتيمة في قاع الترتيب والمركز العشرين حاجة تكسف النقطة مش مجرد رقم، دي ناقوس خطر بيصرخ في وجه الجميع: الإدارة، الجهاز الفني، واللعيبة…وكمان الجماهير !
نزيف النقاط المبكر دخلنا بدون استئذان في نفق الهبوط النفق المظلم بدرى بدرى من الأسابيع الأولى بيضع ضغط عصبي رهيب على الفريق،وعلينا كلنا وبيخلي أي نقطة ضائعة بعد كده بمثابة مسمار في نعش البقاء فى دورى الاضواء .
ياخوفي يا…..لا نحصل الدراويش ومصيرهم المؤلم فى دورى المحترفين لا حول لهم ولا قوة
وجودنا فى القاع حتى الان بعد الأسبوع السادس في قاع المتاعب ليس مبالغة، بل هو إنذار واقعي جداً لما آلت إليه الأمور في الأندية الجماهيرية لما تفقد بوصلة الاستقرار والإدارة الفنية الصحيحة …فقدناها بدرى بدرى . الدوري الممتاز ودوري المحترفين ما بيعتترفش بالأسماء، بل بالجهد والعرق والنقاط داخل المستطيل الأخضر والانتماء لفانلة النادى مش العملية تحصيل حاصل واهو ماتش وهيفوت.
استووب ونقطة نظام قبل فوات الأوان حتى لا نبك على اللبن المسكوب وتدارك الموقف مش مستحيل، لكنه بيحتاج لـ “معجزة عمل وجدية” وتصفية النفوس وتدخل حاسم من إدارة شركة الكرة ومجلس الإدارة لدعم الفريق خاصة مع فترة الانتقالات الشتويةفى يناير مع غربلة الصفوف، وإعادة الروح القتالية للاعبي المحلة اللي تعودنا منهم دايماً الوقوف وقت الشدة. النادى محتاج جراح بمشرط حامى يداوى الجراح فى وقت لا يفيد فيه الندم والمسكنات.
(خدعوك لما قالوا غزل المحلة بخير )
مطلوب وقفة صادقة وشجاعة من أبناء النادي والمخلصين لإنقاذ الموسم قبل فوات الأوان.
ارحمونا قبل فوات الأوان…”القماشة شيطة”محتاجة تدوير صح وكفانا مجاملات ..مع تشكيل لجنة لحل الازمات وتدارك .السلبيات وتحويلها لايجابيات …الادارة ثم الإدارة
